Mobalik ang administrasyong Marcos sa international capital markets pinaagi sa usa ka three-tranche offering sa United States (US) dollar-denominated global bonds. Tumong niini nga pundohan ang national budget ug bayaran ang mga kasamtangang utang, sumala sa report gikan sa Moody’s Ratings.
Sa usa ka pamahayag niadtong Martes, Enero 19, giingon sa Moody’s nga gihatagan nila og Baa2 rating ang gisugyot nga issuance. Gilauman nga kini adunay mga tenor o termino nga 5.5 ka tuig, 11 ka tuig, ug 25 ka tuig, nga ma-mature sa tuig 2031, 2036, ug 2051.
Kini nga multi-tranche nga istruktura nagtugot sa Bureau of the Treasury nga i-apod-apod ang mga obligasyon sa pagbayad ngadto sa short, medium, ug long-term. Matud sa Moody’s, kini nga mga bond giisip nga senior unsecured obligations nga kaparehas og ranggo sa uban pang mga utang sa Pilipinas sa gawas sa nasod.
Ang Baa2 rating nagpakita sa “taas” nga potensyal sa pagtubo sa ekonomiya sa nasod itandi sa ubang mga silingang nasod. Apan, namatikdan sa rating agency nga ang gobyerno padayon nga nakigbisog sa nagkadakong gintang tali sa ambisyoso niining growth targets ug sa tinuod nga dagan sa ekonomiya.
Gilauman sa Moody’s nga magpabiling lig-on ang paglambo sa Pilipinas itandi sa ubang emerging markets, tungod sa kusog nga konsumo sa mga tawo (private consumption) ug ang padayon nga pagsulod sa remittances gikan sa mga overseas Filipino workers (OFWs).
Photo courtesy: Inquirer
