Gipahayag ni Executive Secretary Ralph Recto adlawng Lunes nga magtinabangay ang Philippine Amusement and Gaming Corporation (PAGCOR) ug Philippine Sports Commission (PSC) aron i-upgrade ang mga pasilidad sa sports ug palig-onon ang kalamboan sa mga atleta sa tibuok nasod.
Kini agi og suporta sa tinguha ni Pangulong Ferdinand “Bongbong” Marcos Jr. nga makamugna og world-class nga mga Pilipinong atleta ug ituboy ang Pilipinas isip usa ka kompetitibong nasod sa natad sa sports.
Matud ni Recto, nagkasundo ang duha ka ahensya nga magtinabangay sa pagkompleto ug pag-upgrade sa mga nag-unang sports infrastructure sa nasod. “Magtinabangay ang PAGCOR ug PSC aron hatagan og saktong pasilidad, saktong suporta, ug hapsay nga lugar para mapalambo ang kahanas sa mga Pilipino,” sumala pa kaniya.
Dugang pa niya, gipalig-on niini nga panag-uban ang komitment sa gobyerno nga mamuhunan sa potensyal sa mga Pilipino ug magtukod og pambansang garbo ug oportunidad para sa mga komunidad.
Lakip sa mga nag-unang proyekto mao ang pagkompleto sa Ilocos Norte Sports Institute and Research Building nga butangan og mga training venue alang sa bowling, gymnastics, badminton, sepak takraw, ug uban pang sports.
Paspas usab nga i-develop ang General Luna Convention Center sa Siargao isip usa ka specialized watersports training facility ug academy para sa surfing, coastal rowing, beach sprints, ug dragon boat racing. I-upgrade usab ang mas dako nga Siargao Sports Complex aron adunay mga pasilidad para sa basketball, volleyball, badminton, rubberized track oval, dormitoryo para sa mga atleta, ug convention center.
Ang Zamboanga City Sports Complex himuon nga Regional Training Center para sa Zamboanga Peninsula. Sa Baguio, ang Athletic Bowl kasamtangang gi-rehabilitate ug gi-augment aron magsilbing Regional Training Center para sa Cordilleras, nga adunay track and field oval nga may grandstand, Olympic-size swimming pool, tennis courts, ug uban pang pasilidad.
Sumala ni Recto, gilauman nga kining mga moderno nga pasilidad makapadasig sa sports tourism ug maghatag og dalan sa Pilipinas nga maka-host og mga international competition, nga makapabaskog sa baruganan sa nasod sa tibuok kalibutan nga sports arena.
Photo courtesy: Philippine News Agency
