Nagpagawas ang United States Postal Service (USPS) og commemorative stamp nga nagpasidungog sa boxing legend nga si Muhammad Ali, sa iyang lungsod nga natawhan sa Louisville, Kentucky.
Ang selyo nagpakita ni Ali sa kataas sa iyang karera sa boksing. Sumala sa USPS, 22 ka milyon nga selyo ang naimprinta, nga adunay hulagway ni Ali gikan sa 1974 Associated Press nga litrato, nga nagpakita sa iyang mga kumo nga gipataas sa usa ka fighting stance. Talagsaon usab ang apelyido nga “ALI,” nga gisulat sa bold nga itom ug pula nga mga letra.
Ang beteranong broadcaster nga si Bob Costas ang nangulo sa seremonyas sa pagbukas ug miingon nga ang selyo nagpakita sa malungtarong impluwensya ni Ali sa siyudad diin siya nagdako.
Naglakip usab ang commemorative release sa stamp sheet nga adunay lahi nga imahe ni Ali nga nagsul-ob og pinstripe suit, isip pag-ila sa iyang papel isip aktibista ug humanitarian.
Namatay si Ali kaniadtong 2016 sa edad nga 74 human nakigbugno sa sakit nga Parkinson. Nailhan nga “The Greatest,” nakadawat siya og daghang awards, lakip ang Olympic gold medal sa 1960, United Nations Messenger of Peace Award kaniadtong 1998, ug ang Presidential Medal of Freedom kaniadtong 2005.
Photo Courtesy:USPS
