Nabalintong ang usa ka Toyota Hilux sa may National Highway, Upper Bigue, Brgy. Dawan, Mati City, Davao Oriental niadtong nakalabay nga adlaw.
Base sa report, naila ang driver sa sakyanan nga si Jun Reynand Papas Romano, 42-anyos, minyo ug residente sa Brgy. San Miguel, Tagum City, samtang angol usab ang sakay niini nga si Sarah Jinayon Narrit, 40-anyos.
Subay sa inisyal nga imbestigasyon, nasayran nga gikan Tagum ang sakyanan ug paingon sa Mati City, apan pag-abot sa lugar sa nahitaboan, kalit matod pang nakatulog ang driver hinungdan nga nawad-an kini ug kontrol nga nagresulta sa ilang pagkadisgrasya.
Dali usab nga gidala sa Davao Oriental Provincial Medical Center ang babayeng samaran alang sa medikal nga pag atiman. Sa karon padayon pa ang imbestigasyon sa mga otoridad kabahan sa maong insidente.
Gipahimangnoan usab ang mga driver nga mag amping kanunay sa pagmaneho ug kinahanglan nga anaa sa sakto nga tulog aron malikayan ang bisan unsang aksidente sa kadalanan.
