Gikumpirma sa Bureau of Immigration nga ang Russian vlogger nga si Vitaly Zdorovetskiy gi-deport balik sa Russia.
Sumala sa BI, si Zdorovetskiy misakay sa IrAero flight paingon sa Irkutsk niadtong Sabado. Ang BI Board of Commissioners nimando sa iyang deportasyon niadtong Disyembre 17 human siya gideklarar nga undesirable alien.
Ang deportation order naggumikan sa lain-laing mga reklamo nga gisang-at batok sa 33-anyos nga vlogger tungod sa iyang pagpanghasi ug pagkawalay pagtahod sa pipila ka mga Filipino.
Si Zdorovetskiy unang gidakop niadtong Abril sa miaging tuig. Nailhan siya sa pag-post sa mga prank videos sa social media, lakip na ang pagpanghasi sa usa ka security guard, pagpanghimaraot sa usa ka Pinay nga babaye nga nagsul-ob og face mask, pagpangawat sa industriyal nga electric fan, ug pagsakay og traysikol nga sa ulahi nabangga sa giparking nga jeep.
Atol sa inquest proceedings, giangkon niya ang mga sayop ug gitanggong sa BI Warden’s Facility sa Camp Bagong Diwa sa Taguig. Diin misuway siya pagpiyansa apan gibalibaran siya sa Bureau of Immigration.
Human sa deportasyon, gi-blacklist usab sa Bureau of Immigration si Zdorovetskiy.
Photo Courtesy: Philippine News Agency
