Misangpot sa kamatayon sa lima ka skiers ang duha ka sunod-sunod nga avalanche nga nahitabo sa kabukiran sa Salzburg Pongau region, sumala sa lokal nga mga awtoridad.
Sa unang insidente, upat ka skiers ang namatay human matabonan sa dakong snow slide sa Gastein Valley, sa habagatang bahin sa Salzburg. Duha pa ka lain ang nasamdan ug gilayon gihatagan og medikal nga pag-atiman sa lugar sa panghitabo.
Wala pa mahuman ang rescue operation sa unang avalanche, mga 90 minutos ang milabay, usa na usab ka trahedya ang nahitabo. Usa ka babayeng skier ang nalubong sa ikaduhang avalanche duol sa Bad Hofgastein area, sa kabukiran nga may kahabogon nga 2,200 metros ibabaw sa lebel sa dagat.
Miabot dayon ang upat ka helicopter, mga sakop sa mountain rescue teams, ug ang Red Cross dog unit aron pangitaon ug makuha ang mga biktima ilalom sa baga nga niyebe. Migahin og daghang oras ang operasyon tungod sa lisod nga terrain ug delikadong kahimtang sa panahon.
Tungod sa peligro nga posibleng mosunod pa nga snow slide, temporaryong gisirado sa mga otoridad ang apektadong lugar hangtud nga marekober ang tanang biktima ug masiguro ang kaluwasan sa mga rescuer ug turista.
Nagpagawas usab og pahimangno ang Austrian authorities sa mga skier ug mountaineer nga mag-amping ilabi na sa mga high-risk areas, samtang gipadayon ang pagbantay sa avalanche conditions sa rehiyon aron malikayan ang dugang nga pagkalas sa kinabuhi.
Photo Courtesy:DAILY MAIL
