Gihingusgan sa Department of Information and Communications Technology (DICT) nga wala’y lig-on ug tinuod nga impormasyon ang mga giingong nag-leak nga mga dokumento sa Association of Southeast Asian Nations (ASEAN) 2026.
Base sa pamahayag sa ahensya, nga ang ilang buhatan nakadawat og mga report kalabot sa giingong dili awtorisadong pagpagawas sa mga dokumento nga may kalabutan sa pagpangandam sa Pilipinas alang sa pag host niini sa ASEAN Summit 2026.
Subay sa ilang inisyal nga assessment, ang mga dokumento parehong preparatory ug administrative ug walay nalakip nga mga importanteng dokumento o papeles kalabot sa mga agenda sa ASEAN, opisyal nga deliberasyon kalabot niini, o bisan mga diskusyon alang sa mga polisiya o guidelines kalabot sa summit.
Dugang pa niini, gipasalig usab sa DICT nga wala pay timailhan sa ilang sistema nga nakompromiso na ang mga plataporma ug ubang classified deliberative materials kalabot sa ASEAN.
Samtang, ang DICT nipasalig nga ang Philippine National Police (PNP) kasamtangang nag-imbestiga ug mas palig-onon pa ang cybersecurity measures alang sa ASEAN 2026 alang sa seguridad niini.
Photo Courtesy: Business World
