Usa ka talagsaon ug medyo kataw-anan nga hitabo ang nag trending karon sa China human naospital ang usa ka 7-anyos nga bata tungod lang sa sili.
Sumala sa Chinese media, usa ka pamilya sa Beijing ang nag reklamo batok sa ilang silingan, sa alegasyong hinungdan sa pagka ospital sa ilang anak. Apan sa pag-imbestiga, nahibaloan nga wala diay gihilabtan ang bata kundili siya mismo ang nangawat og pagkaon.
Ang silingan matod pa, kapila na gikawatan sa ilang food delivery. Aron matudluan og leksyon ang kawatan, nag-order sila og pagkaon nga sobra ka halang. Wala sila kahibalo nga ang kawatan diay mao ang 7-anyos nga silingan nga ganahan kaayo mokaon sa ilang gipadeliver.
Sama sa naandan, gikuha sa bata ang pagkaon sa atubangan sa pultahan ug gikaon. Apan human niini, nagsakit ang tiyan ug nagsuka, hinungdan nga gidala siya sa ospital ug na-diagnose sa acute gastroenteritis.
Human masayran nga halang ang pagkaon nga gikaon sa bata, gisingil sa ginikanan ang silingan og 2,000-yuan alang sa gasto sa ospital, ug giakusahan nga gihiloan ang bata.
Apan giingon sa usa ka abogado nga walay sala ang silingan. Ang pag-order og halang nga pagkaon legal ug normal lang, ug ang sili dili man usa ka delikadong substansya nga matawag og hilo.
Sa katapusan, klaro nga ang sili dili ang kontrabida—kundi ang kawatan nga bata.
Moral lesson sa istorya: ayaw pangawat labi na kung dili nimo kaya ang halang sa sili. Og ang mas worst basin sunod mahiloan ka, tungod sa pagkaon og dili imoha.
Photo courtesy: Thrillist
