Sikop ang usa ka lalaki human nadakpan sa mga otoridad atol sa gipatumang buy-bust operation sa Barangay Carmen, Boston, Davao Oriental, niadtong nakalabay nga adlaw.
Gihimo ang operasyon pinaagi sa pwersa sa mga personahe sa Boston Municipal Police Station, uban ang mga sakop sa PDEA 11 nga nagresulta sa pagkasikop ni alya “Tantan”, 37-anyos nga mag-uuma ug residente sa maong lugar.
Nakuha gikan sa suspetsado ang usa ka elongated size heat-sealed transparent plastic sachet nga adunay unod sa gituohang shabu ug usa ka Php500.00 nga buy-bust money ug adunay serial number BF 4713864.
Ang mga nakumpiskang illegal nga droga gibana banang motimbang sa .3 gramos ug adunay standard drug price nga ₱1,800.00. Gimarkahan ug giimbentaryo usab sa lugar sa nahitaboan ang mga nasakmit nga ebidensya, kauban ang Barangay Kagawad sa Brgy. Carmen ug Media Representative.
Sa panahon sa pagdakop, gipahibalo ang akusado sa iyang katungod pinaagi sa pinulongan nga iyang nahibal-an ug nasabtan.
Sa pagkakaron ang dinakpan anaa na sa kustodiya sa Boston Municipal Police Station alang sa hustong disposisyon ug mag-atubang sa kasong paglapas sa RA 9165 (Comprehensive Dangerous Drugs Act of 2002).
Photo Courtesy:Bostonpcr Davor
