Nisalmot ang kapin sa 1,000 ka Pilipinong nurses sa gipahigayong halapad nga strike sa mga ospital sa New York City. Lakip sila sa gibanabanang 15,000 ka nurses gikan sa mga pribadong ospital nga nagpahigayon sa protesta.
Kadaghanan sa mga Pilipinong nurses nga nibalibad sa pagtrabaho nanerbisyo sa napulo ka ospital ubos sa pagdumala sa New York-Presbyterian, Mount Sinai, ug Montefiore.
Gihimo sa mga nurse ang walkout human mapakyas o nag-deadlock ang negosasyon bahin sa ilang hangyo alang sa mas taas nga suholan ug mas maayong mga benepisyo. Gireklamo usab sa mga nurse ang kakuwang sa mga kawani (understaffing) sa mga ospital, nga naghatag og seryosong kabalaka alang sa kaluwasan sa mga healthcare workers ug sa mga pasyente.
Sumala ni New York Consul General Senen Mangalile, naglaum ang konsulada nga masulbad sa labing daling panahon ang panagbangi tali sa New York State Nurses Association ug sa kadumalaan sa mga ospital. Nagpahayag usab og kumpyansa ang Konsulada nga tagaan og bili sa mga employer ang maayong hiyas ug kalidad sa trabaho sa mga Pilipinong nurses.
Tungod niini, nagdeklarar si New York State Governor Kathy Hochul og state of emergency aron maseguro ang panglawas ug kaluwasan sa publiko, ilabi na sa mga pasyente.
Photo courtesy: Good Morning America
