Gipahibalo sa mga otoridad nga ang mga sunog sa kalasangan sa habagatang Argentina mikaylap na sa kapin 15,000 ka ektarya karong semanaha, diin nakaapekto na sa mga residente sa lugar.
Sumala sa kabomberohan sa Chubut nga ang pinakadakong sunog nahitabo sukad pa niadtong Lunes sa Lungsod sa Epuyén sa kabukiran nga dapit sa Andes, diin mokabat na sa 11,980 ka ektarya ang nasunog. Dugang pa, laing sunog ang natala sa Los Alerces National Park ug wala pa natino ang eksaktong gidak-on sa damyos.
Subay niini, padayon pa usab ang mga paningkamot sa kabomberohan sa pagpaugong sa laing duha ka sunog sa Chubut ug sa kasikbit nga probinsya sa Santa Cruz nga nagresulta na sa kapin 3,800 ka ektarya ang nalamoy sa kalayo.
Samtang mokabat usab sa kapin 500 ka mga bombero, uban sa mga rescuers, mga pulis, volunteers ug mga residente sa dapit ang aktibong miapil sa pagpalong sa kalayo sa mga kalasangan.
Photo Courtesy: France 24
