Na-postpone ang open heart surgery sa inahan sa aktres nga si Sue Ramirez human kini namatikdan nga adunay pneumonia, nga maoy hinungdan nga dili pa siya mahimong operahan tungod kay kinahanglan una nga maayo ug lig-on ang kahimtang sa iyang baga. Ang inahan sa aktres nga si Concepcion “Chit” Garina gikatakda unta nga operahan niadtong Enero 7, apan gi postpone una ang maong operasyon tungod sa sakit nga nakaapekto sa iyang pagginhawa.
Ang pneumonia usa ka impeksiyon sa baga nga mahimong mapuno og fluid o nana ang air sacs, nga hinungdan sa lisod nga pagginhawa ug delikado alang sa pasyente nga moagi sa operasyon.
Sa miaging mga adlaw, nangayo og tabang ang aktres sa publiko alang sa blood donation nga gamiton sa operasyon sa iyang inahan. Daghang fans ug netizens ang mi response sa maong panawagan ug misuporta pinaagi sa pagdonar og dugo.
Mailhan nga suod kaayo ang relasyon ni Sue Ramirez ug sa iyang inahan. Gawas sa iyang karera isip aktres sa suspense-thriller series nga What Lies Beneath, nailhan usab siya isip matinud-anon nga anak ug mahigugmaong igsoon sa iyang upat ka igsuon.
Photo Courtesy: MSN
