Nasikop sa mga otoridad ang usa ka High Value Individual (HVI) nga gikonsederang Top 9 sa regional level atol sa usa ka buy-bust operation nga gipahigayon sa Panabo City Police Station, niadtong nakalabay nga adlaw, sa Barangay JP Laurel, Panabo City, Davao del Norte.
Gipangulohan ang operasyon sa Regional Police Drug Enforcement Unit 11 (RPDEU 11) ubos sa pagpamuno ni PCPT Mark Jaeson Kristoffer O. Culaste, ilawom sa pagdumala ni PLTCOL Maynard D. Pascual, Chief of RPDEU 11, uban ang Panabo City Police Station nga giya ni PLTCOL Dexter R. Cuevas, Chief of Police, kauban ang 2nd DNPMFC, 1102nd RMFB 11, RID-PIT, DNPDEU-PSOG, SOU-PDEG, DNPIU ug PDEA Davao del Norte.
Giila ang dinakpan nga si alyas Rene, 28-anyos, single ug lumulupyo sa Sasa, Davao City. Nasikop ang suspetsado human kini mapalitan og gituohang shabu sa usa ka poseur buyer.
Nakuha gikan kaniya ang duha ka sachet sa gituhoang shabu nga may kinatibuk-ang timbang nga 55 gramos ug adunay Standard Drug Price nga balor og Php374,000.00.
Sa pagkakaron, gihuptan na sa Panabo City Police Station ang suspetsado alang sa hustong dokumentasyon ug pagproseso samtang mag-atubang kini og kaso sa paglapas sa Republic Act 9165 o ang Comprehensive Dangerous Drugs Act of 2002.
Photo Courtesy: PNPDavNorPanaboCPS
