Usa ka TikTok video nga unta pang-promote lang sa kan-anan, nahimong ebidensya sa pagpangabit ug karon miresulta sa pagpasaka og kaso sa korte.
Sa Sicily, Italy, nagpasaka og kaso ang usa ka 42-anyos nga lalaki batok sa usa ka restaurant human siya maapil sa ilang promotional TikTok video nga walay iyang pagtugot. Apan ang mas makalingaw ug makurat nga bahin sa istorya ang video mismo mao’y nakaguba sa iyang kaminyoon.
Matod pa sa report, nakita sa iyang asawa ang maong TikTok video diin klaro kaayong kauban sa lalaki ang laing babaye, bisan pa nga iyang gikasulti sa asawa nga business dinner ra matod pa ang iyang giadtoan. Human makita ang video, diretsong gi palayas sa balay ang mister ug gi buwagan.
Tungod niini, ang mister imbes mangayo og pasaylo, gidemanda ang restaurant, nag-ingon nga gilapas ang iyang katungod sa privacy. Ang grupo nga Codacons, usa ka consumer protection association sa Italy, misuporta sa kaso ug miingon nga dili gyud sakto ang pagkuha og video sa customer ug i-post sa social media nga walay klarong pagtugot.
Matod pa sa Codacons, ang usa ka TikTok video nga murag yano ra, mahimong makaguba sa personal ug pamilya nga kinabuhi.
Sa social media, kataw-anan ang reaksyon sa uban: “Imbes libre nga promo, libre pud diay ang gubot!”
Tinood man ni nga istorya, pahinumdom kini sa tanan nga mag bantay, kay basin dili lang views ang makuha, apil na ang problema.
Photo for illustration courtesy to: Pexel
