Nagpagawas og show cause order ang Land Transportation Office sa Central Visayas (LTO-7) ngadto kang Barangay Basak, Mandaue City Kapitan Felipe Diano human nag viral sa social media ang usa ka video nga wala kini nagsul-ob og helmet samtang nagdrive sa iyang motorsiklo.
Sumala sa LTO-7, gawas sa dili pagsul-ob og helmet ang kalapasan nga gibuhat sa kapitan kundi lakip na ang peligroso nga pagmaneho, ug pagpadagan samtang pula ang signal light.
Hinungdan nga gipatawag ang kapitan sa LTO-7 aron mosumite og explanation letter sa Enero 9, 2026.
Gipailawom sa 90 ka adlaw nga preventive suspension ang driver’s license ni Diano. Gibutang usab sa alarm status ang iyang lisensya ug rehistro sa sakyanan.
Gipasabot sa LTO-7 nga ang maong lakang nagpakita sa ilang hugot nga paningkamot ug strikto nga pagpalig-on sa kaluwasan sa kadalanan nga bisan opisyal sa gobyerno dili makalikay ug dili makalabaw sa balaod.
