Mokabat sa dose ka mga medical o first aid stations ang ibutang isip pagsiguro sa kaluwasan sa mga deboto nga mosalmut sa Traslacion atol sa Kapistahan sa Itom nga Nazareno karong Enero 9, 2026.
Sumala pa ni Nick Jabagat, Department Head sa City Disaster Risk Reduction Management Department kon CDRRMD kung itandi sa nilabayng tuig, nadugangan ang ilahang ipangmuntar nga medical aid stations kini tungod sa daghan ang nagboluntaryo nga mutabang.
Matod pa ni Jabagat nga halos matag kanto na sa mga ruta nga maagian sa prosesyon, adunay nakastandby nga medical teams kalakip na mga ambulansya aron nga hinanaling matubag ang unsa mang medikal nga panginahanglan sa mga moapil sa prusisyon.
Aduna usab mga rescue medic nga mag foot patrol o mouban sa panon sa mga deboto. Samtang katambayayong sa CDRRMD sa paghatag og medical assistance ang City Health Office, Burea of Fire Protections, Climbs, Tagoloan-EMS/USAR ug uban pang volunteer groups.
Gihangyo ni Jabagat ang publiko nga buot mosalmut sa prusisyon nga magsuot og mask ug dili na moapil sa kalihukan ang mga adunay balatian.
Sa pikas bahin, gipasiguro sa Task Force Oro, kauban ang Cagayan de Oro City Police Office ug ang Lokal nga Pangagamhanan sa Cagayan de Oro, ang hugot nga seguridad alang sa kapistahan sa Itom nga Nazareno karong Byernes, Enero 9, 2026.
Sumala kang Col. Manuel Estanilla, Commanding Officer sa TF Oro, hapit usa ka bulan na ang ilang gihimong pagpangandam, lakip na ang serye sa mga miting ug koordinasyon sa intelligence sector, aron masiguro nga malinawon ug luwas ang selebrasyon.
Gipahayag ni Col. Estanilla nga gilauman ang pagdagsang sa mga deboto nga mobista sa syudad, apil na ang gikan sa ubang rehiyon, hinungdan nga gipakusog ang police visibility, crowd control, ug mga security measures sa palibot sa simbahan ug mga agianan sa prosesyon.
Nanawagan ang mga otoridad sa publiko nga makigtambayayong, mosunod sa mga pahimangno sa kapulisan, ug magpabiling alerto aron mapadayon ang kalinaw ug kahapsay sa kapistahan sa Itom nga Nazareno.
Photo courtesy: RTA
