Maisugong gihagit ni Colombian President Gustavo Petro si US President Donald Trump sa pahayag nga “come and get me,” human sa hulga sa Presidente sa Estados Unidos sa posibleng sunod nga aksyon batok sa Colombia kasunod sa pag-atake sa Venezuela nga miresulta sa pagkadakop ni Venezuelan President Nicolas Maduro ug First Lady Cilia Flores.
Giingon ni Petro nga dili siya angay hulgaon ug andam siyang mag-atubang sa bisan unsang aksyon, subay sa mga pahayag ni Trump mahitungod sa posibleng military follow-up sa rehiyon.
Giakusahan ni Trump ang Presidente sa Colombia nga nalambigit sa narco-terrorism ug adunay pabrika sa cocaine—mga alegasyon nga hugot nga gilimod ni Petro, nga iyang giingong walay basihan.
Gipahayag usab ni Petro nga andam niyang panalipdan ang iyang nasud, bisan pa nga kaniadto miyembro siya sa M-19 rebel group ug misaad nga dili na mogamit og armas. Matod pa niya, andam siyang makigtagbo kang Trump, face to face base sa tinuod nga intelligence ug dili sa bakak nga impormasyon gikan sa mga political mafia sa Colombia.
Gipasidan-an usab ni Petro nga kung bombahan ang ilang nasud nga walay igong intelihensiya, daghang mga sibilyan ug bata ang mahimong madamay, ug posibleng mobalik sa kabukiran ang liboan ka mga gerilya. Giingon niya nga kung siya dakpon, respetuhon siya sa iyang katawhan ug mahimong buhian ang gitawag niyang “bantog nga jaguar.”
Sa katapusan, gisultihan ni Petro ang administrasyon ni Trump nga nag-atubang sila og usa ka lider nga gisuportahan sa katawhan ug nangayo siya nga hunongon ang tanan nga hulga batok sa Colombia.
Photo Courtesy: South China Morning Post
