Niapela ang kampo sa mga kabanay sa mga nangawala nga sabungero sa Department of Justice (DOJ), nga pasakaan og kaso ang anaa sa gitawag og Alpha Group.
Sa motion for partial reconsideration nga gisang-at sa mga reklamante, buot sa kabanay sa mga biktima nga ilakip ang 39 ka personalidad sa kasong kidnapping with homicide ug kidnapping, ug serious illegal detention.
Apil niini ang aktres nga si Gretchen Barretto, uban sa mga anak sa negosyante nga si Atong Ang ug mga opisyal sa kapulisan sama nila ni Ret. PLT. Jonnel Estomo ug PCol. Jacinto Rodriguez Malinao Jr.
Gitataw sa mga reklamante nga ang mga aksyon sa tanang respondents, nagpakita og prima facie case of special complex crime o adunay igo ug lig-on nga pasiunang ebidensiya nga nahitabo ang usa ka krimen, diin duha o labaw pa nga seryoso nga mga paglapas sa balaod ang dungan nga nahitabo ug adunay makatarunganong kasiguroan nga ang mga suspek nakahimo sa krimen, nga mao ang rason nga ipadayon ang kaso sa korte.
Nagtuo usab ang mga kabanay sa mga missing sabungeros nga dunay panagkunsabo, busa kinahanglang manubag ang tanang nalambigit.
Kahinumduman, nga ang negosyante ug gitumbok nga utok sa pagkahanaw ug kamatayon sa mga sabungero nga si Atong Ang, gipasakaan na kaniadto og kasong kidnapping with homicide ug kidnapping with serious illegal detention niadtong Disyembre 19.
Photo Courtesy: Remate
