Dili lang basketball ug volleyball ang mahimong dalan sa scholarship sa kolehiyo, kundili apil usab ang baseball, kini sumala pa sa usa ka international baseball advocate nga aktibong nagpalambo sa maong sports sa probinsya sa Lanao del Norte.
Matod pa ni Shane Taylor, usa ka American baseball player nga naminyo sa taga-Lanao del Norte, nga daghan nang mga estudyante sa lain-laing lugar sa Pilipinas ang nakahuman sa kolehiyo tungod sa baseball scholarships, ilabi na kadtong miyembro sa dagkong baseball teams.
Gipaambit ni Taylor nga kaniadto, napakyas siya sa pag-apil sa basketball team sa high school tungod sa kakulangon sa height, apan ang baseball nahimong pultahan sa iyang mga oportunidad sa kinabuhi.
Tungod niini, naglaum siya nga mapalig-on ang baseball program sa Lanao del Norte, aron makamugna og mga lig-on nga teams nga makahimo sa pag-apil sa mas dagkong baseball leagues sa nasud.
Samtang mas nadasig usab siya sa performance ug disiplina sa mga atleta sa Sto. Niño High School sa Bacolod, nga migawas nga kampeon sa ‘’Duha ka Adlawng Inter-High School Baseball Tournament’’.
Sa umaabot, nagtinguha si Taylor nga, uban sa suporta sa provincial government, madala sa Lanao del Norte ang usa ka International Baseball Tournament.
Walo ka teams ang misalmot sa unang provincial inter-high school baseball games, diin ang Lala National High School mao ang second placer, Munai National High School ang nakaangkon sa third place, ug Kapatagan National High School ang nakakuha sa fourth place.
Miapil usab ang Baroy National Comprehensive High School, uban ang duha ka private schools nga Sapad ug Mercy.
Ang maong tournament kabahin sa sports development program sa lalawigan ubos sa liderato ni Governor Mohamad Khalid Quibranza Dimaporo, kauban ang 2nd District Representative Congresswoman Aminah Quibranza Dimaporo, nga nagtumong sa pagpalapad sa oportunidad sa kabatan-onan pinaagi sa sports.
Photo Courtesy:Kiefer USA
