Nakahukom nga mo-file og diborsyo ang Miss International 1979, ug aktres nga si Melanie Marquez sa iyang Amerikanong bana nga si Adam “Randy” Lawyer, human siya giingong gipaubos sa sunod-sunod nga physical, emotional, ug financial abuses sulod sa kapin sa duha ka dekada.
Sa pakighinabi niya kang Boy Abunda, gipaambit ni Melanie ang pipila ka mga insidente sa giingong pagpanglugos sa iyang bana ngadto kaniya, lakip na ang pagsumbag kaniya ug pagtion og pusil sa iyang nawong. Dugang pa niya nga giabuso usab siya sa pulong ug gitortyur sa mental ug pinansyal.
Matod pa sa beauty queen nga nisumiter na siya og suwat ngadto sa Bureau of Immigration aron kanselahon ang visa sa iyang bana ug i-blacklist kini sa nasud.
Sa iyang istorya, nahinumdom siya nga sa unang tuig sa ilang kaminyoon, gipugos siya sa iyang bana sa pagtrabaho sa uma sa Utah, nga maoy hinungdan sa kamatayon sa bata nga iyang gisabak.
Lakip sa iyang gi-report niadtong 2022 mao ang giingong gitionan siya og pusil ug gisumbag sa dunggan samtang natulog nga nakaapekto sa iyang pandungog.
Samtang niadtong 2025, giingong nibalik ang kasakit dihang gisumbag siya sa dughan samtang anaa sa sakyanan nga niresulta sa pagkabali sa gusok.
Photo Courtesy: Philstar life
