Giawhag sa kadumalahan sa Security Management Division, ang tanang Iliganon nga magpabiling alerto, magpakabana, ug gilayong moreports kon adunay makit-an nga kadudahang tawo sulod sa syudad sa Iligan.
Sa eksklusibong pakighinabi sa Juander Radyo News Team, gipadayag si Marlon Clapano, Division Head sa Security Management Division, nga dako kaayo ang papel sa katawhan sa pagmintinar sa kalinaw ug kasegurohan sa komunidad.
Matod pa ni Clapano, kinahanglan ang aktibong kooperasyon sa publiko aron mapugngan ang posibleng insidente ug mapadayon ang malinawong sitwasyon sa dakbayan.
Samtang gipahinumduman usab niya ang mga kawani sa LGU Security, Market Police, ug uban pang frontline personnel nga tarungon ang ilang buluhaton ug ipakita ang matinud-anong serbisyo sa katawhan.
Gidugang pa ni Clapano nga ang pagserbisyo sa gobyerno dili lamang alang sa personal nga interes o sa kaugalingong pamilya, kondili usa ka responsibilidad alang sa seguridad ug kaayuhan sa tibuok Iligan, nga iyang padayon nga gipasiugda.
