Gipahibalo sa City Health Office ug City Civil Registrar’s Office ang bag-ong proseso nga sundon sa tanang kaso sa out-of-hospital deaths o mga pagkamatay nga wala nahitabo sulod sa hospital, nga ipatuman sugod ning tuig 2026.
Sa bag-ong pamaagi, kinahanglan una nga ang pamilya sa namatay mokuha og Barangay Certification gikan sa barangay diin nagpuyo ang namatay.
Ang maong dokumento maglangkob sa kompletong detalye sa namatay lakip na ang hinungdan sa kamatayon.
Human niini, dad-on ang Barangay Certification sa City Health Office aron iproseso ug pirmahan ang Death Certificate. Kung mahuman na kini, mosunod ang pagdala sa Death Certificate ngadto sa Embalmer alang sa pirma.
Sa katapusang lakang, ang registration sa Death Certificate buhaton sa City Civil Registrar’s Office, nga maoy opisyal nga mohatag og legal nga rekord sa kamatayon, sa higayon nga kompleto na ang tanang gikinahanglan nga pirma ug dokumento.
Gipahinumduman usab ang publiko nga mahinungdanon kaayo ang pagsunod sa bag-ong proseso aron malikayan ang kalangan sa dokumentasyon ug uban pang legal nga isyu.
