Pormal nang ipatuman ang wage increase sa Rehiyon 10 subay sa Wage Order No. RX-24, nga giaprobahan human sa serye sa public hearing ug konsultasyon sa tripartite body nga gilangkuban sa gobyerno, sektor sa mga mamumuo, ug mga employer.
Ang maong wage increase ipatuman sa duha ka hugna—ang first ug second tranche—aron matabangan ang mga trabahante samtang gihatagan usab og igong panahon ang mga negosyo sa pag-adjust sa mas taas nga sweldo.
Sakop sa Wage Category 1 ang mga syudad sa Cagayan de Oro, Iligan, Malaybalay, Valencia, El Salvador, ug Ozamiz, lakip na ang mga munisipyo sa Tagoloan, Villanueva, Jasaan, Opol, Maramag, Gingoog, Manolo Fortich, ug Lugait.
Sa eksklusibong pakighinabi sa Juander Radyo Malaybalay, gipasabot ni Kim Jame S. Bangcong, Labor Employment Officer III sa DOLE Bukidnon, nga ang kasamtangang minimum wage nga Php461 madugangan og Php25 sugod Enero 16, busa mahimong Php486. Dugang pa, sa Mayo 1, adunay laing Php14 nga increase nga magdala sa minimum wage sa Php500 alang sa Wage Category 1.
Samtang sa Wage Category 2, nga naglakip sa tanang lugar nga wala masakop sa Category 1 ug sa mga retail ug service establishments nga adunay 1 hangtod 9 ka trabahante (micro-establishments), ang kasamtangang minimum wage nga Php446 madugangan usab og Php25 sa Enero 16, busa mahimong Php471. Sa Mayo 1, adunay Php14 nga dugang, nga magdala sa minimum wage sa Php485. Sa kinatibuk-an, ang total wage increase alang sa Category 1 ug Category 2 moabot sa Php39, nga ipatuman sa duha ka hugna.
Ang wage increase nga epektibo Enero 16, 2026 gilauman nga makahatag og dugang pinansyal nga kahupayan sa mga trabahante ug makatampo sa padayon nga kalig-on sa ekonomiya sa Rehiyon 10.
via: DOLE Bukidnon
