Kalit nga nag emergency interruption ang NORDECO sa pipila ka bahin sa Island Garden City of Samal (IGACOS) probinsya sa Davao del Norte, niadtong milabay’ng adlaw sa gabii tungod sa usa ka tuko.
Matod pa sa NORDECO, nagsugod ang power interruption sa Purok 2 ug Sitio Bocaue, Barangay Toril, Samal, pasado alas-otso sa gabii human nikatkat ang usa ka tuko sa linya sa kuryente.
Dugang pa niini, nakahatag sumala pa kini og problema sa mga residente sa giingong mga dapit, hinungdan nga nagka-short circuit nga misangpot sa pagkapalong sa kuryente.
Hinuon, dali ra usab nga nabalik ang kuryente human ang dul-an usa ka oras nga pagpaningkamot sa mga staff sa nansagpit nga kooperatiba nga abtik nga miresponde sa giingong lugar.
Pasidaan sa NORDECO alang sa publiko nga ang mga hayop sama sa langgam, tuko ug bisan ang kanding nga nakasaka kaniadto sa mga kable, mamahimo gayud maka-brownout kung makaabot kini sa mga primary line wires.
Sa pagkakaron, nibalik na sa normal ang dagan sa kuryente sa giingong mga dapit sa wala pa ang alas-diyes sa gabii sa susamang petsa.
Courtesy : NORDECO
