Nasikop ang usa ka 63-anyos nga senior citizen tungod sa kasong shoplifting sa usa ka ukay-ukayan sa Tres de Mayo, Digos City niadtong nakalabay nga adlaw.
Sumala sa imbestigasyon sa kapulisan, nahitabo ang insidente alas 5:00 sa hapon, ang suspek minyo ug residente sa Brgy. Libertad, Saging, Makilala, North Cotabato, nasakpan nga nangawat og tulo (3) ka assorted shorts nga ₱250.00 matag usa.
Ang suspek nasakpan sa tag-iya sa tindahan sa dihang mosulay na untang mogawas sa main door sa establisemento. Dayon kining gipugngan ug gi-report sa kapulisan.
Alas 5:45 sa hapon, miresponde ang patrol operatives nga sila PMSG Elmer Mariscal ug Pat Denver Ferraren, nga nagpatrolya sa maong lugar sa oras sa insidente, ug ilang gi-aresto dayon ang suspek ug giendorso sa Digos City Police Station kauban ang 33-anyos nga babayeng complainant, residente sa SRV Building, Quezon Avenue, Tres de Mayo, Digos City.
Gipahinumdoman sa Digos City Police Station (DCPS) ang publiko nga magpabiling mabinantayon batok sa kawat ug i-report dayon ang bisan unsang kadudahang kalihokan aron mapadayon ang kalinaw ug kahapsay sa komunidad.
Courtesy: Digos City Police Station
