Nahupay ang dugay nang kahadlok sa mga residente sa Sitio Sulog, Barangay Halapitan, San Fernando human sa kamatayon sa ilang silingan nga si Jhony Looc, kinsa giilang notorious ug high-risk wanted person sa maong lugar.
Si Looc namatay dihang misukol sa kapulisan atol sa pagserbisyo sa iyang mga Warrant of Arrest. Ang maong engkwentro nahitabo niadtong nakalabay nga adlaw, didto sa iyang payag sa Purok 1, Barangay Vintar, Valencia City. Apil usab sa namatay ang usa ka lalaki nga giilang Jhan Jhan, nga sumala sa kapulisan nadamay lamang sa maong panghitabo.
Sa eksklusibong pakighinabi sa Juander Radyo Malaybalay, giingon ni Sitio Leader Imelda Quiño nga dugay na kaayo nilang problema sa Sitio Sulog ang presensya ni Looc. Matod niya, kanunay kining naghimo og kasamok ug naghatag og kahadlok sa mga lumolupyo, hinungdan nga daghan ang nagkinabuhi sa kabalaka ug kahadlok sa dugay nga panahon.
Kahinumdumang base sa record sa kapolisan ang suspetsado adunay patong-patong nga mga kaso lakip ang pagpatay ug frustrated murder.
Sa karon, case-closed na ang kaso may kalambigitan sa suspetsado tungod sa wala damhang panghitabo. Samtang, gipahinumdoman sa kapulisan ang publiko nga ang hustisya ug kaluwasan magpabiling prayoridad, ug gi-awhag ang katawhan nga magpadayon sa pakigtambayayong sa mga awtoridad alang sa usa ka malinawon ug luwas nga komunidad.
via: Juander Radyo Malaybalay/Valencia City PNP
