Mokabat sa kapin o kulang ₱100,000.00 ang nakuha sa tulo ka wala mailhing suspetsado sa usa ka pagpanulis-patay nga nahitabo sa Barangay Aglayan, dakbayan sa Malaybalay bisperas sa pagsugat sa bag-ong tuig Disyembre 31, 2025
Ang biktima giila nga si Romel Arenga, 51-anyos, adunay live-in partner ug residente sa Purok 6 sa maong barangay driver ni Ronela Yares, tag-iya sa usa ka fruit stall.
Sa eksklusibong pakighinabi sa Juander Radyo Malaybalay, giingon ni PMSG Kent Hanzel Bughaw, PIO sa Malaybalay City PNP, nga alas 9:15 sa gabii sa adlaw sa insidente, kalit lang miabot ang tulo ka suspetsado ug mideklara sa hold-up pagkahuman gipahapa ang biktima sa wala pa gipusil nga miresulta sa kamatayon niini.
Dugang pa ni PMSG Bughaw, sa lugar sa krimen narekober ang usa ka 9mm nga pistola nga gipanag-iya sa biktima, samtang duha ka basiyo sa bala ang nakuha gikan sa gituohang gigamit sa mga suspetsado.
Gihimakak usab sa kapulisan ang mga pagduda nga ang maong mga suspek mao ra usab ang responsable sa kaniadtong pagpanulis sa usa ka retired army sa maong barangay. Bisan pa niini, gipasalig sa PNP nga gipalawman na ang imbestigasyon aron mailhan ug madakpan ang mga responsable ug mapanubag sa balaod.
Sa pagkakaron, nagpahimangno ang Malaybalay City Police Station sa publiko nga magmabinantayon sa tanang higayon. Tambag sa kapulisan, kon adunay susamang insidente, unahon gayod ang seguridad ug kaluwasan sa kinabuhi kaysa sa mga materyal o mahalong butang.
Courtesy: PNP Malaybalay
