Isip kabahin sa selebrasyon sa National Women’s Month karong bulana, ang Integrated Provincial Health Office (IPHO) Zamboanga del Sur, nagpahinumdom sa mga kababayen-an mahitungod sa kahinungdanon sa pag-ila sa mga sintomas sa cervical cancer pina-agi sa regular nga pagpacheck-up.
Sumala pa ni Dahlia Aseniero, Health Education and Promotion Officer IV, ang cervical cancer usa sa mga nag-unang hinungdan sa kamatayon sa kababayen-an, apan kini malikayan ug matambalan kung sayo nga mamatikdan.
Ang maong sakit kasagaran walay klarong sintomas sa sinugdanan, mao nga importante ang regular nga screening sama sa Papsmear ug Visual Inspection with Acetic Acid (VIA).
Dugang pa ni Asieniero nga ang mga posibleng sintomas sa cervical cancer naglakip sa dili normal nga pagdugo sa kinatawo sa babaye atol sa regla, sakit sa ubos nga bahin sa tiyan o balakang, adunay dili normal nga vaginal discharge, sakit panahon sa pakighilawas.
Segon pa ni Asienero isip kabahin sa Women’s Month celebration, adunay ipahigayon nga health education sessions, libreng screening ug information campaign sa nagkadaiyang lungsod sa probinsya sa Zamboanga del Sur.
