Lima ka high-value target (HVT) ang nadakpan sa gilusad nga buy-bust operation sa Prk. 5, Brgy. Poctoy, Surigao City nidtong nakalabay nga adlaw.
Ang operasyon gipangulohan sa Philippine Drug Enforcement Agency Regional Office XIII Surigao del Norte Provincial Office ubos sa pagpangulo ni Agent Paul Estalani, uban ang hiniusang pwersa sa Surigao del Norte Provincial Intelligence Unit, Surigao City Police Station Drug Enforcement Unit, ug PDEA RO13-LPU.
Nasakmit sa operasyon ang gibanabana nga 60 gramos nga shabu nga adunay street value nga P420,000, samtang ang standard value niini mokabat sa Php408,000. Lakip sa ebidensya ang usa ka heat-sealed plastic sachet nga adunay 2.5 grams nga shabu nga subject sa pag baligy, ug duha ka sachet nga adunay kinatibuk-ang 60 grams.
Narekober usab ang buy-bust money nga usa ka Php1,000 bill uban ang boodle money, upat ka android phones, usa ka Nokia keypad phone, usa ka Honda Beat nga motorsiklo, usa ka yellow nga public motorcycle nga adunay sidecar, ug nagkalain-laing identification cards.
Ang mga nadakpan giila nga sila Garry Maturan Alciso, 55-anyos, Ronnie Taripe Malig-on, 47- anyos, Carlo Omapas Ampater, 39-anyos, Glen Lisondra Lolo, 45-anyos, ug Angelo Rebucas Precillas, 34-anyos ang duha kanila kanhi na usab na aresto tungod sa druga.
Ang mga suspetsado mag atubang karon og kaso tungod sa paglapas sa Section 5 ug Section 11, Article II sa Republic Act No. 9165 Comprehensive Dangerous Drugs Act of 2002, samtang nag pabugnaw na sa selda.
