Gipahigayon sa mga personahe sa Revitalized Pulis sa Barangay (R-PSB) Cluster 4 ang Oplan Bulabog checkpoint operation sa Barangay San Alfonso, Cateel, Davao Oriental, pasada ala 1:00 sa hapon niadtong milabay nga adlaw.
Ang operasyon gipangunahan ni Team Leader PSMS Cyril R. Garcia, uban sa 1st Davao Oriental Provincial Mobile Force Company (1st DOPMFC) nga gipangulohan ni PMAJ Gladden S. Manzano, Acting Force Commander, diin miresulta sa pagkasikop sa isa ka indibidwal tungod sa paglapas sa kasamtangang mga ordinansa.
Atol sa checkpoint, gipatuman ang Republic Act 4136 o Land Transportation and Traffic Code, ingon man ang Barangay Ordinance No. 03, Series of 2023, nga nagdili sa wala kinahanglana ug dili kasagaran nga kusog nga tingog gikan sa mga motorsiklo ug sakyanan, videoke/karaoke systems, ug uban pang amplified audio devices, ilabina sulod sa mga residential area ug pampublikong kadalanan sa barangay.
Kini nga operasyon kabahin sa padayon nga kampanya sa kapulisan ilawom sa Oplan Bulabog aron mapadayon ang kahapsay, kalinaw, ug kahilom sa komunidad.
