Patay ang usa ka lalaki human kini gipusil sa wala mailang gunman sa may Purok Masanagon, Sitio Nazareth, Barangay Buenavista, Pagadian City,niadtong nakalabay nga adlaw.
Ang biktima naila sa alyas “Bakbak”, nagpangidaron ug 36-anyos, minyo, self-employed ug residente sa Barangay Buenavista, Pagadian City, samtang wala pa nailhan ang suspetsado.
Sa imbestigasyon nasayran, ang biktima anaa lang kini sa dapit ug kalit lang gipusil sa gunman gamit ang wala matino nga klase sa armas. Duha ka mga samad pinusilan sa ulo ang na-angkon sa biktima hinungdan sa iyang hinanaling kamatayon.
Samtang dali nga misibat ang suspetsado paingon sa wala matino nga direksyon human sa pagbuhat sa kremin.
Na-recover sa mirespondeng pnp personnel ang usa ka empty shell sa caliber 45 nga pistola sa dapit nahitabuan. Samtang anaa na sa punerarya ang patay’ng lawas sa biktima aron sa mapahiluna.
Sa pagkakaron ang mga kapulisan sa Pagadian City Police Station naghimo na kini ug hot pursuit operation aron madakpan ang suspetsado.
