Gimandoan sa Department of Foreign Affairs (DFA), ang Philippine Consul General sa Sydney nga i-monitor ug tutokan dayon kung adunay mga Pinoy nga nalambigit o naapektuhan sa mass shooting nga nahitabo sa Jewish event sa Bondi Beach, Australia.
Kini aron masiguro ang kaluwasan ug kaayohan sa mga Pilipino sa maong lugar. Sumala pa kang Foreign Affairs Spokesperson Angelica Escalona, ang DFA padayon nga nakig-alayon sa gobyerno sa Australia aron mahibaloan kung adunay mga Pilipino ang naapektuhan sa trahedya nga mass shooting.
Base sa pinakaulahing datos ug impormasyon nga nakuha gikan sa mga otoridad sa Australia, walay gikatahong naangol o namatay sa mga Pinoy sa mass shooting.
Dugang pa ni Escalona nga ang Philippine Consulate sa Sydney padayon nga nagmonitor ug nagtabang sa mga Pinoy sa maong lugar.
Gipaniguro sa Konsulado nga walay Pilipino nga naapektuhan sa nasangpit nga insidente ug andam mohatag og tabang ug suporta kung gikinahanglan.
Nanawagan usab ang ahensya sa mga Pilipino sa Sydney nga magpabiling mabinantayon ug sundon ang tambag sa lokal nga otoridad.
Photo Courtesy to: Al Jazeera
