Gilauman sa nasud nga mo-import og ubos sa upat ka milyon nga metrik tonelada (MT) nga bugas sa 2026, tungod kay ang pag-import og bugas gikatakda nga mobalik sa Enero human sa upat ka bulan nga pagdili sa pag-import aron mapalig-on ang pag-ubos sa presyo sa bugas sa mga umahan.
Sa usa ka pahayag niadtong Martes kon kagahapong adalawa, si Agriculture Secretary Francisco Tiu Laurel Jr. miingon nga ang gilauman nga gidaghanon sa pag-import og bugas sa sunod tuig anaa sa taliwala sa 3.6 milyon ngadto sa 3.8 milyon nga MT.
Ang projection giingon nga gibase sa forecast sa Department of Agriculture (DA) nga 20.3 milyon nga MT nga produksiyon sa bugas sa 2026—ang parehas nga target karong tuiga nga wala matuman tungod sa baha ug uban pang dili maayong kondisyon sa panahon. Niadtong 2023, ang nasud nakatala og rekord nga ani sa bugas nga 20.06 milyon nga MT.
Sumala ni Tiu Laurel, ang gilauman nga gidaghanon sa pag-import igo na aron matubag ang panginahanglan sa bugas sa nasud nga dili mokunhod ang presyo sa bugas sa lokal nga merkado.
Niadtong Disyembre 15, ang kalihim nagpahigayon og konsultatibong miting uban sa mga tig-import og bugas aron ihulagway ang plano sa gobyerno nga mas maayo nga ma-calibrate ang gidaghanon sa importasyon. Ang tumong mao ang pagpabilin nga barato ang presyo sa bugas para sa mga konsumidor samtang giseguro ang patas nga kita para sa mga mag-uuma—usa ka balanse nga gikataho nga gisuportahan sa mga tig-import
via: PNA
