Gi-aprubahan ni President Ferdinand R. Marcos Jr. ang tinuig nga year-end incentives alang sa mga empleyado sa gobyerno ug mga contract workers isip pag-ila sa ilang dedikasyon ug matinud-anong pag-alagad sa katawhan.
Pinaagi sa Administrative Orders No. 39 ug 40, gitugotan ang paghatag sa Service Recognition Incentive (SRI) ug gratuity pay isip pasalamat sa ilang dakong kontribusyon sa pagpatuman sa mga programa ug serbisyo sa gobyerno.
Subay sa maong mga mando, ang SRI mahimong moabot og hangtod ₱20,000 alang sa tanang kwalipikadong empleyado sa gobyerno, lakip na ang mga nagtrabaho sa national government agencies, state universities and colleges (SUCs), government-owned and controlled corporations (GOCCs), ug mga uniformed personnel sama sa AFP, PNP, BFP, BJMP, BuCor, Philippine Coast Guard ug uban pa.
Apil usab sa coverage ang Judiciary, Kongreso, Office of the Ombudsman, constitutional offices, local government units (LGUs) ug mga empleyado sa barangay, depende sa available nga pondo sa ilang tagsa-tagsa ka ahensya.
Gilauman nga magsugod ang payout karong adlawa, Disyembre 15, 2025.
Alang sa mga Contract of Service (COS) ug Job Order (JO) workers, maghatag ang gobyerno og one-time gratuity pay, base sa gidugayon sa ilang satisfactory service:
₱7,000 — alang sa adunay 4 ka bulan o labaw pa nga serbisyo
₱6,000 — alang sa 3 hangtod 4 ka bulan
₱5,000 — alang sa 2 hangtod 3 ka bulan
₱4,000 — alang sa ubos sa 2 ka bulan
Gipahayag sa administrasyon nga dako ang papel nga gipatun-an sa mga COS ug JO workers sa adlaw-adlaw nga operasyon ug malampusong pagpatuman sa mga programa sa gobyerno, busa angay lamang nga hatagan sila og hustong pag-ila ug pasalamat.
Photo courtesy: Malacañang
