Giaprobahan sa bicameral conference committee ang Php33.009 bilyon para sa mga proyekto sa farm-to-market road (FMR) ubos sa gisugyot nga 2026 national budget, bisan pa sa mga kabalaka bahin sa implementasyon ug accountability.
Nakab-ot ang desisyon niadtong Sabado, Disyembre 13, human sa halos duha ka oras nga deliberasyon sa bicam panel. Gisugyot ni Rep. Mikaela Suansing sa House Committee on Appropriations ang pagpahiuli sa Php32 bilyon nga pondo gikan sa bersyon sa House, apan giinsistir sa Senado nga Php16 bilyon lang ang aprubahan katumbas sa alokasyon sa National Expenditure Program (NEP) para sa 2026.
Daghang mga senador, lakip sila si Sen. Pia Cayetano, Loren Legarda, Imee Marcos, ug Erwin Tulfo, ang mipadayag sa ilang kabalaka bahin sa posibleng isyu sa korapsyon ug kakulang sa accountability, labi na kay ang pagpatuman sa mga proyekto ibalhin na sa Department of Agriculture (DA)—usa ka gimbuhaton nga kaniadto ubos sa Department of Public Works and Highways (DPWH).
Sumala ni Sen. Imee Marcos, limitado ang kapasidad sa DA tungod kay aduna lang kini mga 65 ka personnel sa tibuok nasud, busa adunay pagduhaduha kon kaya ba niini nga dumalahon ang dagkong mga proyekto sa imprastraktura.
Giaprobahan usab sa BICAM ang sugyot nga tugotan ang DA nga makig-partner sa mga local government units (LGUs) o mogamit sa public-private partnerships (PPP) para sa mas epektibong implementasyon sa mga proyekto.
Photo Courtesy to: Philippine News Agency
