Giila ang mga mag-uuma ug organisasyon sa Bukidnon pinaagi sa Gawad-Saka Awarding Activity agig padayon nga pagsuporta sa pagpalambo sa sektor sa agrikultura sa pagpanguna ni Provincial Agriculture Officer Maria Lilith Turan.
Gisuportahan ang kalihukan ni City Mayor J. Warren R. Pabililan, uban sa City Agriculture Office nga gipangulohan ni Engr. Richard B. Leono isip hiniusang paningkamot alang sa kalamboan sa pagpanguma.
Sa pakighinabi sa Juander Radyo Malaybalay, gibutyag ni Leonard Lyros, Chairman sa City Agriculture and Fisheries Council (CAFC) sa Malaybalay, nga ang tumong sa Gawad-Saka Award mao ang pag-ila ug pagpasidungog sa mga mag-uuma ug organisasyon nga nakapakita og kalampusan ug dakong kontribusyon sa sektor sa agrikultura.
Dugang pa ni Lyros, nga karon nakasalmot ang CAFC Malaybalay sa maong pasidungog diin lakip sa mga gipasidunggan ang mga miyembro sa City Agriculture Advisory Council (CAAC) ug lain-laing asosasyon sa mga mag-uuma nga nagrepresentar sa sektor sa humay, mais, pangisda, agro-industrial, agripreneurship, ug agri-tourism.
Ang Gawad-Saka Award usa ka simbolo sa panaghiusa, paningkamot, ug paglaum alang sa padayon nga kalampusan sa panguma sa Bukidnon ug sa siyudad sa Malaybalay.
