Gidepensahan ni Department of Public Works and Highways (DPWH) Secretary Vince Dizon ang pag-uli sa pagbawas sa pundo sa iyang buhatan alang sa 2026 budget. Gikan sa Php624.48 bilyones, gikunhuran kini sa Kongreso ngadto sa Php570.48 bilyones.
Matod ni Dizon, wala sila mangayo og reinstatement sa mga partikular nga proyekto sama sa flood control o tulay, kondili ang Php45 bilyones aron maseguro ang tukmang pagpatuman sa mga proyekto.
Dugang ni Dizon nga ang mga pagpabawas gibase sa bag-ong Construction Materials Price Data (CMPD) nga nagtugot sa pag-ubos sa presyo sa mga materyales alang sa mga proyekto sa ahensya.
Apan iyang gipasiugda nga kini nga mga pagkunhod sa presyo dili aron ibalik ang nangaging taas nga presyo, apan aron mahiuyon sa bag-ong mga cost standards.
Bisan paman giangkon ni Dizon nga naapektuhan ang pagsalig sa publiko sa DPWH tungod sa nangaging mga isyu sa kurapsyon sa mga proyekto sa flood control, apan iyang gipasalig nga dili kini mahitabo ubos sa iyang pagdumala.
Apan gikabalak-an ni Senador Kiko Pangilinan ang posibleng overpricing, ilabi na nga gikasabotan kaniadto nga pakunhuran ang mga gasto sa proyekto.
Sa laing bahin, gikuwestiyon ni Senador Sherwin Gatchalian ang kasaligan sa mga buhatan sa district engineering ug gipasiugda ang panginahanglan sa mas hugot nga pagtutok sa mga proyekto aron malikayan ang overpricing.
Sa pikas bahin, gikwestiyon ni Negros Occidental 3rd district Representative Javier Benitez si Dizon kung malikayan ba gyud ang korapsyon sa umaabot nga mga tuig ubos sa gipasa karon nga mga reporma.
Photo Courtesy to: PNA
