Nagkatapok ang mga sakop sa Tatak Organik Kauswagan Farmers Association o TOKFA sa ilang General Assembly nga gipahigayon ubos sa tema nga “Panaghi-usa sa organiko nga pag-uma para sa himsog nga komunidad ug malungtarong kaugmaon.”
Ang kalihokan gipasiugdahan sa Municipal Agriculture Office, diin naghiusa ang mga organic coconut farmers aron palig-onon ang panaghiusa ug paningkamot sa pagpausbaw sa malungtarong pagpanguma sa lungsod sa Kauswagan.
Gidasig ni Vice Mayor Rommel Arnado ang mga mag-uuma nga padayon nga palambuon ang coconut farming, nga nag-unang panginabuhian sa lungsod, ilabina karon nga taas ang demand sa lubi sa lokal ug internasyonal nga merkado.
Sumala pa sa bise-mayor, billion-peso industry ang coconut sector ug dako ang oportunidad nga makuha sa Kauswagan pinaagi sa pagpausbaw sa lokal nga produksyon. Iyang gipahibalo nga adunay na karon 12-hectare nursery plantation ang lungsod nga tanumanan og dwarf-variety coconuts, nga mahimong tinubdan sa seedlings nga ipang-apod-apod sa mga mag-uuma.
Garbo usab sa LGU nga ang Kauswagan lamang ang lungsod sa Lanao del Norte nga adunay third-party Participatory Guarantee System o PGS certification gikan sa Control Union, nga nagpakita sa hugot nga pagsunod sa mga pamantayan sa organic farming.
Gipasiguro sa mga opisyales nga pinaagi sa panaghiusa sa TOKFA, padayon nga mapalambo ang coconut industry sa lungsod. Gitapos ang programa sa pag-apod-apod og 25 kilos nga bugas alang sa matag mag-uuma, isip pasalamat ug suporta gikan sa LGU Kauswagan.
Photo courtesy to: Municipality of Kauswagan, Lanao del Norte
