Gipasalig sa City Planning and Development Office (CPDO) sa Iligan City nga walay drayber ug operator nga mabiyaan sa pagpatuman sa bag-ong Local Public Transport Route Plan o LPTRP.
Matod ni Environmental Planner Elsa M. Maquiling, CPDO Coordinator, nga ang LPTRP naporma pinaagi sa hugot nga koordinasyon ug konsultasyon uban sa mga driver ug operator associations ug mga kooperatiba, aron masiguro nga ang plano motubag sa tinuod nga panginahanglan sa transport sector ug sa komunidad.
Gipasabot usab ni Maquiling nga kabahin sa LPTRP ang gitawag nga security net framework sa syudad, nga naglatid sa mga pamaagi sa paghatag ug suporta sa mga drayber nga posibleng maapektuhan sa pagbag-o sa routing system, ilabina kadtong maapil sa phase out.
Gipasiugda sa CPDO nga ang tanang proyekto sa administrasyon ni Mayor Frederick Siao nagasukip sa prinsipyo nga ang kalamboan alang sa tanan ug walay mabiyaan, ug nga ang pagpalambo sa City Planning maghatag usab ug kaayohan sa pagdumala sa LPTRP ug sa tibuok transport sector sa Iligan City.
Photo courtesy to: Iligan LGU
