Naghimo og inisyatiba sa kalikupan ang Google human kini nag-hire og 200 ka kanding aron mokaon og sagbot sa palibot sa ilang Mountain View campus sa California kaniadtong tuig 2009.
Imbes mogamit og gas-powered lawn mowers, natural nga gipahimuslan sa kompanya ang pagpakaon ug sagbot ngadto sa mga kanding.
Sulod sa usa ka semana, naglibot-libot ang grupo sa kanding uban ang usa ka pastol ug usa ka border collie nga naggiya kanila.
Gikaon sa mga kanding ang sagbot, gi-trim ang mga tanom nga sobra og tubo, ug natural pa gyud nga gi-abunuhan ang yuta pinaagi sa ilang mga hugaw samtang naglaag-laag ang kanding sa ilang campus.
Kini nga ideya nakahatag ug malinawon, limpyo, ug walay emisyon ang pag proseso. Bisan pa og medyo makalingaw paminawon ang ideya, kini misubay sa dugay na nga adbokasiya sa Google alang sa malungtarong praktis ug pagpanalipod sa kalikupan.
Ang maong eksperimento nakapukaw usab og daghang hisgutanan bahin sa pagka mamugnaon ug eco-friendly nga alternatibo sa tradisyonal nga pag-atiman sa palibot.
Hangtod karon, nagpadayon kini nga usa sa labing nindot nga ehemplo sa Google kung giunsa mahimong praktikal ug katingalahan ang pag sustain sa palibot.
Photo Courtesy to:Bad Friends
