Giklaro sa Malacañang kagahapong adlawa nga ang dakong bahin sa sobra nga pondo sa Philippine Health Insurance Corporation (PhilHealth) nga nagkantidad og Php60 bilyon gigahin alang sa mga importanteng programa sa panglawas ug social services nga direktang nakabenepisyo sa publiko.
Sa usa ka press briefing sa Palasyo, si Presidential Communications Office (PCO) Undersecretary ug Palace Press Officer Claire Castro miingon nga ang Department of Health (DOH) gihimakak ang mga alegasyon sa pipila ka sektor bahin sa sayop nga paggamit sa pondo. Gipunting niya nga ang dakong bahin sa maong kantidad gideposito sa lain-laing mga programa sa gobyerno, lakip ang Health Emergency Allowance (HEA).
“Sumala sa report sa DOH niadtong Martes, hapit 6 milyon nga mga healthcare worker ang nakabenepisyo gikan sa maong programa sa PhilHealth,” matod ni Castro.
Sumala ni Castro, ang HEA gihatag sa mga medical frontliner nga nagserbisyo atol sa kataas sa pandemya sa COVID-19.
Gawas sa HEA, matod niya nga ang pondo gigamit usab alang sa medical assistance sa mga kabus nga mga pasyente, pagpalit og mga kagamitan medikal para sa mga ospital sa DOH, mga ospital sa lokal nga gobyerno, ug mga primary care facility.
Gipasiugda sa Opisyal sa Palasyo nga ang dakong kantidad sa maong pundo nipadulong sa tulo ka pasilidad sa panglawas sa DOH ug sa Health Facilities Enhancement Program (HFEP).
Samtang ang Korte Suprema bag-ohay pa lamang nagmando sa pag-uli sa Php60 bilyon nga pundo sa PhilHealth nga gi-remit sa nasudnong panudlanan sa 2024. Kini nga kantidad kabahin sa gibanabana nga PhP89.9 bilyon nga “sobrang pundo” nga gikatakdang ibalhin sa nasudnong panudlanan.
Dugang pa niadtong Septiyembre 20, 2025, si Presidente Marcos nagmando sa pag-uli sa PhP60 bilyon nga pundo sa PhilHealth, isip pag-ila sa gipauswag nga trabaho sa ahensya ug dugang nga mga benepisyo para sa mga miyembro.
Source: PCO
Photo Courtesy to:
