Gipahibalo sa Securities and Exchange Commission (SEC) nga motambayayong sila sa TikTok aron edukaron ang publiko bahin sa investment scams ug fraud, gamit ang popularidad sa social media platform aron mas daghan maabot.
Sumala ni SEC Commissioner Rogelio Quevedo, ang pakig-alyansa pinaagi sa Memorandum of Understanding (MOU) sa ByteDance Philippines naglatid og plano sa pagtudlo sa mga Pilipino sa kasagarang financial scams, pagpugong niini, ug pagtangtang sa delikado nga content samtang nagpasabot sa risgo.
Ilalom sa MOU, ang SEC magreport sa TikTok og mga suspicious nga videos para sa review ug aksyon base sa community guidelines sa platform. Maghimo usab ang duha ka partido og usa hangtod tulo ka videos ilalom sa kampanya nga #ThinkTwice aron tudluan ang publiko unsaon pag-ila ug paglikay sa scams, ug uban pang inisyatibo sa financial literacy.
Ang una nga video magpunting sa Ponzi schemes nga nagpasalig og garantisadong kita gikan sa bag-ong kontribusyon sa mga investors. Ipakita kini sa TikTok ug sa #ThinkTwice Resource Hub.
Si Yves Gonzalez sa TikTok nagsulti nga importante ang pakig-partner sa SEC aron matabangan ang mga Pilipino nga mag-navigate sa digital world nga luwas ug edukado batok sa scams.
SOURCE: PNA
