Gipahibalo ni Presidente Ferdinand Marcos Jr. nga mogawas na karong semanaa ang arrest warrant batok kang Cezarah “Sarah” Discaya, tag-iya sa St. Timothy Construction, nga giakusahan sa maanomalyang flood control project sa Davao Occidental.
Giingon sa Presidente nga dili na dugay ang pagdakop niini, samtang walo ka taga-DPWH sa Davao Occidental ang mitug-an nga mosurender sila sa NBI tungod sa ilang kaso. Ang gobyerno andam usab mosang-at og malversation ug falsification charges batok kang Discaya ug pipila ka DPWH officials.
Mitaho ang PNP nga nag-deploy na sila og tracker teams aron pangitaon si Discaya ug uban pang nalambigit sa ghost project nga nagkantidad halos Php100 milyon. Misamot kalig-on ang kaso human ang iyang bana, si Pacifico ‘Curlee’ Discaya, miangkon sa Senado nga adunay panagsabot sa DPWH ug mambabalaod para sa kickbacks.
Matod sa Presidente, dili angay kawaton ang pondo para sa mga Pilipinong pirmi mabahaan ug unya modagan dayon ang nakasala. Gipasabot niyang magpadayon ang imbestigasyon ug pagpanubag aron mabalik ang kwarta sa katawhan.
Si PBBM nagpasalig nga kapin 40 ka indibidwal ang ipapriso sa dili pa moabot ang Pasko.
Photo Courtesy to: Vera files
