Nagmabungahon ang gipahigayon nga labing una nga Cebu City Open Dayon-Dayon Volleyball Tournament sa Plaza Independencia ning Dakbayan sa Sugbo.
Ang ‘dayon-dayon’ usa ka lahi nga bersiyon sa duwang volleyball diin lahos-lahos ang pagdala sa bola sa usa ka player ngadto sa iyang kontra. Gidili ang pagpasa sa bola ngadto sa kauban hinungdan nga way hunong ug kulbahinam ang aksiyon.
Giorganisa sa Cebu City Sports Commission (CCSC) nga gipangulohan sa chairman niining si Dr. Rhoel Dejaño inabagan ni Ryan “Busagak” Rubi, usa ka prominenteng personalidad sa ‘dayon-dayon’ nga komunidad, ang makasaysayong torneyo gisalmotan og 16 ka paresan matag usa sa men’s ug women’s division.
Sunod tuig, si Dejaño nagkanayon nga mopahigayon sila og laing talagsaon nga kompetisyon. Kini mao ang Olympics alang sa mga senior citizens nga ilang pagasundon gikan sa World Senior Games.
