Nagpadayon ang mga rason sa pagtipig sa kwarta sa mga Pilipino, diin ang seguridad sa pinansyal, pagpanag-iya og balay, edukasyon, ug pagbiyahe maoy nanguna nga mga tumong, base sa usa ka survey nga gihimo sa Metropolitan Bank & Trust Co. (Metrobank).
Sumala sa survey, nasuta sa bangko nga 21 porsyento sa 1,200 ka respondents ang nagtipig aron lang magtukod og emergency fund o mag-andam para sa umaabot nga panginahanglan. Ang ubang rason naglakip sa pagpalit o pagpaayo sa balay nga 16 porsyento, ug mga leisure activities sama sa pagbiyahe, konsyerto, o hobby nga gisulti sa 14 porsyento sa mga tubag.
Nagkalain-lain usab ang tumong sa pagtipig depende sa lugar. Sa Metro Manila, ang pinansyal nga kalig-on maoy labing gipalabi sa 23 porsyento, gisundan sa gastuhon alang sa balay nga 19 porsyento, ug pagbiyahe o leisure nga 17 porsyento.
Sa gawas sa kapital, ang edukasyon ang nag-una nga prioridad. Gibana-bana nga 20 porsyento sa mga respondents sa mga rehiyon ang nagtipig para sa tuition o uban pang gastuhon sa eskwelahan alang sa ilang kaugalingon o pamilya.
Gipahibalo sa Metrobank nga ang kalainan nagpakita sa access ug oportunidad, nga sa Metro Manila mas dako ang kita ug mas daghan ang access sa mga eskwelahan ug financial services, samtang sa ubang rehiyon ang edukasyon giisip nga dalan padulong sa mas maayong kaugmaon.
Dako usab ang papel sa edad sa porma sa pagtipig. Sa mga batan-on nga 18 hangtod 24 anyos, ang pinansyal nga seguridad ang nag-una nga rason. Gisundan kini sa personal nga palit sama sa gadgets o sinina nga 21 porsyento, ug gastuhon sa edukasyon nga 18 porsyento. Sa mga batan-on sa gawas sa Metro Manila, hapit usa sa upat ang nagtipig alang sa edukasyon.
Ang mga nagatrabaho nga 25 hangtod 44 anyos mas giuna ang pagpanag-iya og balay ug pinansyal nga kalig-on, nga pareho gisulti sa 23 porsyento. Ang pagbiyahe ug leisure nagpabilin nga hinungdan sa 18 porsyento sa kini nga grupo.
Alang sa mga middle-aged nga Pilipino nga 45 hangtod 64 anyos, ang prioridad mo-shift ngadto sa long-term planning ug panginahanglan sa pamilya. Gibana-bana nga 23 porsyento nagtipig para sa retirement, 20 porsyento para sa edukasyon sa anak ug umaabot nga gastuhon, ug 14 porsyento alang sa pagbiyahe o leisure.
Gipahimangno sa Metrobank nga kini nga mga trend nagpakita og nationwide pattern diin ang mga tigulang nga nagtipig mas giuna ang kalig-on ug kaayohan sa pamilya.
Photo courtesy to: Inquirer Business- Inquirer.net
