Wala na magsayang ug oras pa ang Philippine Coast Guard (PCG) human nga malampuson nilang napalayas ang usa ka barko sa Chinese Coast Guard palayo sa kadagatan sa Panatag Shoal niadtong Sabado, Disyembre 6, 2025.
Kabahin niini, daling naglusad ug lakang ang multi-role response vessel nga BRP Cape San Agustin aron nga mapahawa ang barko sa China taliwala sa ilang nasinatian nga kusog nga paghapak sa balod.
Usa sa ilang gibuhat mao ang pagpatuman o pag-isyu ug radio challenges ngadto sa Chinese vessel nga CCG-3303, nga naghangyo i-undang na ug ihunong ang pagpahigayon ug illegal maritime patrols sulod sa EEZ (Exclusive Economic Zone) sa Pilipinas.
Gibantayan usab ang ubang barko sa Chinese Coast Guard nga adunay bow number 3305 ug 3502, diin nagsuroy suroy ug nagpahigayon ug mga illegal nga kalihokan duol sa shoal.
Kalabot niini, gipasalig usab ni PCG Commandant Admiral Ronnie Gil Gavan nga ilang depensahan ang maritime rights sa nasud ubos sa United Nations Convention on the Law of the Sea, Philippine Maritime Zones Act ug sa 2016 arbitral ruling sa West Philippine Sea.
Photo Courtesy to: Balita
