Nangulo sa pagsaulog sa World AIDS Day karong tuiga ang Lokal nga Panggamhanan sa Gensan, pinaagi sa City Health Office (CHO) uban sa pakigtambayayong sa Bureau of Jail Management and Penology (BJMP), sulod sa city jail isip kabahin sa nagpadayong kampanya batok sa HIV ug AIDS.
Mitambong si Executive Assistant for Health, Mr. Arby Ace Buensuceso, isip representante sa Mayor diin maoy mihatag og message support sa kalihokan.
Gihatagan niya og gibug-aton ang lig-on nga pasalig sa LGU-Gensan sa pagpasiugda sa mga programa sa kahimsog-dili lamang alang sa komunidad, apan alang usab sa mga Persons Deprived of Liberty (PDLs).
Lakip sa mga kalihokan mao ang libreng HIV testing alang sa mga PDL nga gipahigayon sa CHO, uban sa sunodsunod nga mga diskusyon bahin sa HIV—sa unsang paagi kini motakod, unsaon paglikay niini, ug ang importansya sa sayo nga pag-patest.
Tumong niini nga mapalig-on ang kahibalo sa mga PDL bahin sa HIV aron makunhuran ang stigma ug masiguro ang kaluwasan ug kahimsog sulod sa prisohan.
Matod sa CHO, ang pagdala sa maong matang sa serbisyo sulod sa correctional facilities usa ka pruweba nga walay sektor nga mabiyaan sa kampanya batok sa HIV.
Kabahin kini sa mas lapad nga pangandoy sa dakbayan nga ipasiugda ang inklusibo ug komprehensibong serbisyo sa panglawas para sa tanang katawhan sa Gensan.
Photo Courtesy to: LGU-GenSan
