Taliwala sa nagkalain-laing mga pagsulay ug hagit nga giatubang, lakip na ang sunod-sunod nga mga katalagman nga miigo sa nasud ug ang padayon nga isyu sa korapsyon, nagpabilin nga lig-on ang ekonomiya sa Pilipinas.
Kini ang gipasigarbo ug gibida sa Department of Economy, Planning and Development (DEPDev) ngadto sa publiko, human nila natala ang positibong resulta sa paglambo sa ekonomiya sa unang tulo ka bahin o quarter sa tuig 2025.
Sumala sa datos nga gipagawas sa DEPDev, nakab-ot sa nasod ang 5% average growth rate sa unang tulo ka quarter sa 2025.
Atol sa gipahigayon nga Year-end Press Chat sa DEPDev, gipahayag ni Economic Planning Secretary Arsenio Balisacan nga nakatala usab ang Pilipinas og headline inflation nga anaa sa 1.7%, usa ka resulta nga nasulod pa gihapon sa target range nga 2% hangtod 4% nga gitakda sa gobyerno.
Kini nagpakita sa epektibo nga pagdumala sa presyo sa mga palaliton ug serbisyo sa nasod. Dugang pa niini, gireport usab ni Secretary Balisacan nga nagpabilin nga aktibo ang labor market condition sa nasod.
Kini gipamatud-an sa natala nga 4.5% unemployment rate, nga nagpasabot nga mas daghang Pilipino ang adunay trabaho ug panginabuhi. Samtang, natala usab ang underemployment rate sa 14.2%, nga nagpakita nga aduna gihapon mga mamumuo nga nangita og dugang oras o mas maayo nga oportunidad sa trabaho.
Gawas pa sa mga nahisgutan, gireport usab sa kalihim nga nagpabilin nga lagsik ang banking system sa nasod, nga gisuportahan sa pagtubo sa mga investment.
Photo courtesy: DEPDev Region X – Northern Mindanao
