Milukso ngadto sa ilang ika-12 nga straight nga kadaugan ang Oklahoma City Thunder human mipildi sa Portland Trail Blazers, 123-115.
Pinaagi sa maong kadaugan, nisaka ang rekord sa Thunder ngadto sa 20-1, diin ang ilang bugtong kapildihan karong season gikan ra gihapon sa Portland niadtong Nobyembre 5.
Nanguna sa Oklahoma City si Shai Gilgeous-Alexander nga adunay 26 puntos, samtang si Chet Holmgren mibuhat og 19 puntos ug siyam ka rebounds, bisan pa sa iyang foul trouble sa ikatulo ug ikawpat nga quarter. Sa iyang ikaduhang duwa human sa wrist surgery, si Jalen Williams midugang og 16 puntos ug walo ka rebounds sulod sa 34 minutos.
Sa pikas bahin, mibarog si Deni Avdija alang sa Blazers pinaagi sa usa ka hilabihan ka kusgan nga triple-double performance: 31 puntos, 19 rebounds, ug 10 assists. Midugang si Toumani Camara og 19 puntos ug walo ka rebounds, samtang si Jerami Grant mitira og 18 puntos.
Nanguna ang Thunder og 76-74 sa ikatulong quarter apan napakyas sila sa ilang challenge sa ika-upat nga foul ni Holmgren. Mibalik siya sa pagsugod sa ika-upat nga quarter apan nadakpan dayon ang iyang ikalima nga foul, hinungdan nga nakaduol ang Portland sa 95-93.
Sa pagbalik ni Holmgren uban pa sa 8:08 sa orasan, nabawi sa Thunder ang momentum. Usa ka layup ni Kenrich Williams mipalapad sa abante ngadto sa 102-93, ug iyang 3-pointer misaka kini sa 105-96 paglabay sa pipila ka minuto.
Usa ka fadeaway jumper ni Gilgeous-Alexander mipauswag sa Thunder ngadto sa 107-100 nga abante. Bisag nakaduol pa ang Portland sa 107-105, nagpabilin nga kalma ang Thunder ug gigamit ang ilang kasinatian aron sirad-an ang duwa.
Photo Courtesy to: Inquirer.net
