Niadtong Nobyembre 15, 240 ka tawo ang nagpundok sa usa ka shopping center sa Baotou City, probinsya sa Inner Mongolia sa China, aron muapil sa usa ka dili kasagaran nga kompetisyon nga inspire sa ‘lying flat’ movement. Ang “Lying flat” usa ka popular nga internet slang sa mainland China nga naghulagway sa estilo sa kinabuhi nga nag-undang sa subsub nga pagkiglumba (rat race) sa baylo kini nga dula kinahanglan lang nimo nga maghigda og walay buhaton.
Ang mga lagda sa kompetisyon simple ra: ang mga sumasalmot kinahanglan nga maghayang lang sa kutson, ug bisan pa og gitugotan sila nga magligid-ligid sa kutson, magbasa og libro, mokaon, o mogamit sa ilang mga smartphone, wala sila gitugotan nga mobangon gikan sa kutson o bisan sa pag-adto sa kasilyas. Ang katapusang tawo nga magpabilin nga naghayang ideklara nga mananaog.
Bisan og walay time limit ang kompetisyon, sulod sa unang 24 oras, 186 ka sumasalmot ang na- eliminate. Kadtong nagpabilin sa ilang mga kutson og nagsunod sa estriktong mga lagda nga anam-anam nga gipaila, ug pagkahuman sa 30 ka oras, pipila na lang ka tawo ang nahabilin sa kompetisyon.
Sa 33 ka oras ug 9 ka minuto, 3 na lang ka sumasalmot ang nahabilin sa lying flat contest. Duha ka minuto ang milabay, usa ang na-eliminate. Ang nahibiling 2 ka sumasalmot milungtad og kapin sa 20 ka minuto, ug sa katapusan, sa 33 ka oras ug 35 ka minuto, usa kanila miundang, ug ang usa gideklara nga mananaog.
Ang Chinese media nagtaho nga ang mananaog sa Baotou City lying flat contest nagsuot og diapers aron malikayan ang pag-adto sa kasilyas, apan mao usab ang gibuhat sa uban nga miapil sa kompetisyon, busa wala siya gi-disqualify o gipahamtangan og silot. Nakadaog siya og 3000 yuan ($420), samtang ang second-place winner nakakuha og 2000 yuan ($280), ug ang third-place winner 1000 yuan ($140).
Ang lying flat contest gikataho nga usa ka dako nga hit sa China, diin tinagpulo ka milyon nga mga tawo ang nagtan-aw sa livestream sulod sa 33 ka oras ug 35 ka minuto.
Photo courtesy: The Sun
